И покрај напредокот во медицината, кардиоваскуларните заболувања и натаму се меѓу водечките причини за смртност на глобално ниво. Специјалистите предупредуваат дека предупредувачките знаци не секогаш се очигледни и често се појавуваат таму каде што најмалку ги очекуваме – дури и на кожата.
Еден од сигналите што може да укаже на проблем со циркулацијата е појавата на сивкасто-син или виолетов мрежест узорок на кожата. Оваа промена може да биде поврзана со нарушен проток на крвта, како и со оштетување на ткивата или одредени органи.
Состојбата е позната како livedo reticularis. Според дерматолозите од Американската академија за дерматологија, овој карактеристичен мрежест изглед најчесто се јавува кога крвта потешко циркулира во малите крвни садови веднаш под површината на кожата.
Во многу случаи, појавата е безопасна. Ако узорокот се јавува само при изложеност на студ или како реакција на одредени медикаменти, нема причина за загриженост. Како што објаснуваат лекарите, со загревање на кожата, ваквата промена обично целосно исчезнува.
Сепак, постојат ситуации кога мрежестиот изглед на кожата може да сигнализира сериозен здравствен проблем. Една од можните причини е синдромот на холестеролна емболизација, состојба при која малите артерии се блокираат, што може да доведе до оштетување на ткивата и органите. Доколку узорокот е постојан или е придружен со болка, рани, крутки или други симптоми, неопходна е итна лекарска консултација.
Според Mayo Clinic, постои и поретка состојба наречена livedo racemosa, која често се поврзува со сериозни кардиоваскуларни нарушувања. Токму поради тоа, ваквите промени на кожата не треба да се игнорираат.
Доколку забележите дека мрежестиот узорок на кожата не исчезнува, тоа може да биде тивко предупредување од вашето тело. Навремената посета кај кардиолог може да направи значајна разлика и да спречи посериозни компликации.
МОЖЕБИ ЌЕ ВЕ ИНТЕРЕСИРА:
