Иако се на пазарот повеќе од една деценија, најавата за прекин на производството на Model S и Model X дојде како изненадување за многумина. Уште поголемо изненадување е тоа што Tesla се одлучи на овој чекор пред воопшто да ги претстави нивните наследници.
Производството на двата најдолготрајни модели ќе биде прекинато веќе во следниот квартал, со цел да се ослободи простор за нов приоритет – масовно производство на хуманоидните роботи Optimus. Веста ја потврди извршниот директор Илон Маск за време на презентацијата на финансиските резултати на компанијата.
„Време е суштински да ги завршиме програмите Model S и Model X со почесно збогување“, изјави Маск за време на повикот со инвеститорите, додавајќи дека фокусот на Tesla сè повеќе се насочува кон иднина базирана на автономија и роботика.
Маск призна дека ова е емотивен момент за компанијата, но нагласи дека амбициите се значително поголеми. Според него, Tesla има цел да произведува до еден милион роботи Optimus годишно, откако производствениот процес целосно ќе се пренамени и стабилизира.
Tesla Model S за прв пат беше претставен во 2012 година и брзо стана симбол на луксузниот електричен автомобил. Во текот на годините претрпе неколку надградби, со поголемо освежување во 2017 година. Иако подоцна се сметаше дека моделот стагнира, кон крајот на 2025 година доби благ фејслифт со модернизирани светла и малку зголемен дострел.
Model X, луксузниот SUV на Tesla, дебитираше во 2015 година и остана препознатлив по своите „falcon wing“ врати. Како и Model S, и овој модел со години остана речиси непроменет, добивајќи само помали дизајнерски корекции и подобрен дострел во последниот период. Сепак, овие подобрувања сега стануваат ирелевантни, бидејќи Tesla продолжува напред без двата модели што долго време ја дефинираа нејзината понуда.
Компанијата, сепак, не се повлекува од автомобилската индустрија. Во иднина, Tesla ќе се фокусира на Model 3, Model Y и Cybertruck. Во текот на 2025 година, Model 3 и Model Y заедно остварија продажба од над 1,6 милиони возила, што ги позиционира меѓу најпродаваните електрични автомобили во светот. За споредба, Model S, Model X и Cybertruck заедно достигнаа продажба од само 50.850 единици.
Прекинувањето на производството на Model S и Model X е директно поврзано со реорганизацијата на производствените линии во фабриката на Tesla во Фремонт, Калифорнија, каде што треба да започне масовното производство на роботите Optimus. Маск има амбиција Tesla да стане лидер во автономните системи, а целта од еден милион роботи годишно засега звучи како визија од научна фантастика.
Model S, сепак, ќе остане запаметен како една од иконите на електричниот автомобилизам – луксузен и технолошки напреден седан што ја забрза транзицијата на целата индустрија кон електромобилноста. Особено верзијата Plaid остави силен впечаток со своите перформанси и забрзување, кои долго време немаа вистинска конкуренција.
Додека Tesla го пренасочува својот фокус кон роботиката и автономијата, автомобилската индустрија и љубителите на електричните возила се простуваат од моделите што ја обележаа една цела ера. Иако Model 3, Model Y и Cybertruck ќе продолжат да се продаваат, заминувањето на Model S и Model X означува крај на едно навистина значајно поглавје – не само за Tesla, туку и за модерната автомобилска историја.
МОЖЕБИ ЌЕ ВЕ ИНТЕРЕСИРА:
