Претседателот на Владата на Република Северна Македонија, Христијан Мицкоски, учествува на 62-тата Минхенска безбедносна конференција и на првиот ден оствари низа важни средби со странски лидери и претставници на глобални корпорации.
Во видео-обраќање од Минхен, Мицкоски истакна дека денот го започнал со состанок со високи претставници на германската компанија „Шварц“, една од најголемите меѓународни корпорации со приходи од над 180 милијарди евра годишно. Според премиерот, компанијата, заедно со групацијата „4iG“, планира дополнителни инвестиции во Северна Македонија, особено во области како вештачка интелигенција, дата центри и енергетика.
Македонската делегација учествуваше и на свеченото отворање на конференцијата, каде свое обраќање имаше и германскиот канцелар, а Мицкоски имаше и средба со претседателот на Антонио Кошта. На таа средба тој истакна дека е важно Европската интеграција на Северна Македонија да се води на фер и предвидлив начин кој ќе го почитува идентитетот и интересите на граѓаните.
Премиерот, исто така, ја поздрави најавата за трговскиот договор со Белата куќа, кој ќе овозможи подобар пристап на македонските компании до американскиот пазар и подобрување на економските перспективи.
Мицкоски најави дека во наредните денови од конференцијата очекува уште успешни средби и позитивни вести за Македонија.
МОЖЕБИ ЌЕ ВЕ ИНТЕРЕСИРА:
