Сто и дваесет млади девојки и студентки од Македонија, Турција, Косово, Шпанија и Мозамбик учествуваа на меѓународниот онлајн настан „Leading in Energy and Mining: The Professional Journey of Sanja Bozhinovska“, посветен на женското лидерство во енергетиката, инженерството и рударството. Настанот ги обедини младите жени со експерти и лидери од стратешките индустрии, со цел да ги инспирира да градат кариера во STEM областите и да преземат лидерски улоги.
Во центарот на настанот беше професионалната приказна на министерката за енергетика, рударство и минерални суровини, Сања Божиновска, која сподели искуства од својата кариера и визија за развој на енергетскиот сектор во време на брзи технолошки промени.
– Енергетските системи се трансформираат, а технологијата се развива побрзо од кога било. Младите жени со своето знаење и амбиција ќе ја обликуваат иднината на секторот – истакна Божиновска.
Таа нагласи дека вистинското лидерство се гради преку знаење, одговорност и тимска работа. „Нема сектор премногу сложен, нема позиција премногу висока и нема предизвик премногу голем за жените кои се подготвени да водат“, подвлече министерката.
На настанот се обрати и Тања Михајловска Димитриевска од Women on Boards Adria, истакнувајќи дека поголемото присуство на жени во управните одбори и лидерските позиции не е само прашање на еднаквост, туку предуслов за посилни институции и поодржлив економски развој.
Иницијативата Global Engineer Girls беше претставена како важна платформа за поддршка на младите жени во STEM, преку стипендии, менторство, практикантска работа и обуки. Г-ѓа Еда Јегиналтaј Курт од Limak Foundation посочи дека ваквите настани создаваат простор младите жени да видат реални примери на лидерство и да се мотивираат да ја обликуваат својата професионална иднина.
Организаторите потенцираа дека ваквите настани го градат дијалогот помеѓу генерациите – помеѓу жените кои веќе носат одлуки и младите кои допрва ќе ја обликуваат иднината на енергетиката, технологијата и одржливиот развој.
– Патот можеби нема секогаш да биде лесен, но е возможен – и не го одите сами – порачаа тие.
Министерката Божиновска заклучи дека иднината на енергетиката и инженерството е инклузивна, иновативна и сè повеќе предводена од жени лидери.
– Енергетиката и рударството ги движат економиите. Но лидерството – етичко, инклузивно и визионерско – е она што го движи вистинскиот напредок – истакна таа.
МОЖЕБИ ЌЕ ВЕ ИНТЕРЕСИРА:
