Реал Мадрид повторно успеа да го елиминира Манчестер Сити во нокаут-фазата на Лигата на шампионите, славејќи во реванш осминафиналето со 2:1 на „Етихад“ и потврдувајќи го триумфот од првиот меч (3:0) кој ги однесе во четвртфиналето.
Манчестер Сити добро започна, создавајќи неколку стопроцентни шанси, но не успеа да го погоди голот на Тибо Куртоа. Клучниот момент се случи во 20. минута кога Бернардо Силва со рака го сопре ударот на Винисиус, судијата му покажа црвен картон и досуди пенал. Винисиус го реализираше ударот за водство на Реал од 0:1, што го најави исходот на натпреварот.
Домаќините успеаја да израмнат преку Ерлинг Халанд во 41. минута (1:1) и имаа неколку шанси во првите 10 минути од вториот дел, но резултатот остана непроменет. Реал остана без првиот голман Куртоа поради повреда, но резервистот Лунин го оправда довербата со неколку одлични интервенции. Во последните секунди од продолжението Винисиус го постигна својот втор гол и го обезбеди пласманот на „Лос Бланкос“ во четвртфиналето.
Во другите натпревари, ПСЖ повторно го декласира Челзи, овој пат на гостински терен во Лондон, со високи 0:3. Парижани дојдоа до водство уште во 6. минута преку Кваратсхелија, а веќе во 14. минута Баркола зголеми на 0:2, што претставува рекорд за Челзи, никогаш досега не примиле два гола во првите 14 минути на меч од ЛШ. Конечните 0:3 ги постави Мајулу во 62. минута, а навивачите на Челзи масовно го напуштија стадионот.
Арсенал ја спаси честа на англиските тимови. На реванш дуелот со Баер (Л) пред домашните навивачи, „топчиите“ доминираа и обезбедија победа од 2:0, што беше доволно за пласман меѓу осумте најдобри. Езе го отвори резултатот во 36. минута со моќен удар, а Деклан Рајс во 63. минута го постави конечниот резултат и потврди пласманот на Арсенал во четвртфиналето.
МОЖЕБИ ЌЕ ВЕ ИНТЕРЕСИРА:
