Советот на јавните обвинители на денешната седница донесе одлука за избор на четворица јавни обвинители во Основното јавно обвинителство за гонење организиран криминал и корупција (ОЈО ГОКК), иако огласот предвидуваше пополнување на пет позиции.
За нови обвинители се избрани Александар Маркоски, Ана Гоговска-Јакимовска и Ана Стојковиќ-Димитриовска, кои доаѓаат од Основното јавно обвинителство Скопје, како и Енѓелуше Кадриу-Леши, кандидат од немнозинските заедници, на која ова ѝ е трет мандат во ОЈО ГОКК.
Претседателот на Советот, Башким Селими, информираше дека на огласот за пет обвинители се пријавиле осум кандидати, но двајца – Трајче Пеливанов и Артан Ајро – ги повлекле своите кандидатури пред гласањето.
По разгледување на пријавите, Советот на јавно гласање не им даде поддршка на четворица кандидати – Марија Ѓоргева, Валентина Бислимовска, Сузана Мирческа-Кузмановска и Ивана Трајчева. Меѓу нив, Ѓоргева не доби ниту еден глас, додека Бислимовска доби само еден.
Во текот на расправата, дел од членовите на Советот посочија дека треба да им се даде предност на обвинители кои досега не работеле во ОЈО ГОКК. Членката Светлана Стојковиќ нагласи дека иако сите кандидати се квалитетни, смета дека новите кадри заслужуваат шанса, особено во услови кога дел од кандидатите веќе имаат долг стаж во ова обвинителство.
Сличен став изрази и членката Кети Петкова, која поддржа избор на обвинители надвор од ОЈО ГОКК, но и на Кадриу-Леши, со цел да се задржи правичната застапеност.
Државниот јавен обвинител Ненад Савески изјави дека иако не учествувал во интервјуата, ги разгледал сите кандидатури и одлучил да ги поддржи обвинителите кои доаѓаат надвор од ова обвинителство. Тој посочи дека е разочаран од малиот број пријавени кандидати, нагласувајќи дека треба да се охрабрат обвинителите да конкурираат и да напредуваат во кариерата.
И покрај изборот на четворица обвинители, едно место остана непополнето, додека Советот не донесе одлука ниту за избор на шеф на Вишото јавно обвинителство Скопје, по повлекувањето на досегашниот раководител Мустафа Хајрулахи.
МОЖЕБИ ЌЕ ВЕ ИНТЕРЕСИРА:
