Битола добива нова мајска фестивалска приказна, во која виното, музиката и градското дружење ќе се спојат на едно од најпрепознатливите места во градот, платото пред Офицерски дом. Од 7 до 9 мај ќе се одржи првото издание на Вински фестивал Битола, кое денеска беше најавено на прес-конференција во ЈОУ Културен и информативен центар Битола – Офицерски дом.
Организаторите најавија дека фестивалот е замислен како нов градски настан што треба да ја надополни културно-забавната понуда на Битола и да создаде уште еден повод за дружење, дегустација и уживање во отворена фестивалска атмосфера.
Деталите за првото издание ги соопштија претставникот на организацијата на Вински фестивал Битола, Пане Темов, градоначалникот на Општина Битола, прим. д-р Тони Коњановски, директорот на ЈОУ КИЦ Битола – Офицерски дом, Димитар Михајловски, како и претставник на бендот Паркети, кој е дел од музичката програма на фестивалот.
Со крајот на работната недела стартуваат трите вечери со внимателно одбрана музичка програма, домашни винарии, гастрономска понуда и атмосфера што треба да го продолжи препознатливиот мајски ритам на градот. Според Пане Темов амбицијата е фестивалот да прерасне во препознатливо случување за Битола.
„Ова е прво издание на Вински фестивал Битола, но идејата е фестивалот да стане традиција и секоја година да носи нова енергија во градот. Сакаме да создадеме настан кој ќе ги поврзе љубителите на доброто вино, домашните винарии, музиката и градското дружење. Битола има публика која знае да препознае добар настан, а виното е култура, приказна и повод луѓето да се сретнат во убава атмосфера“, истакна Темов.
Фестивалската програма е замислена како спој на различни музички вкусови и генерации. На сцената пред Офицерски дом ќе настапат повеќе домашни изведувачи, меѓу кои B52, „Пауза за ракија“, DJ Александар Јорданов, Lockdown, Камерен оркестар Битола, DJ Гоце Саф, Zdrave Music, „Љубојна“ и „Паркети“. Организаторите најавуваат програма што го следи духот на Битола, разновидна, урбана и опуштена, со доволно простор и за концертна атмосфера и за лежерно фестивалско дружење.
Посетителите ќе имаат можност да дегустираат вина од домашни винарии. Винската култура кај нас сè повеќе се развива како препознатлив дел од гастрономската и туристичката понуда. Затоа и виното, како што беше посочено на прес-конференцијата, не е само пијалак, туку дел од традицијата, од современиот начин на уживање и од приказната за локалните производители.
Градоначалникот на Општина Битола, прим. д-р Тони Коњановски, го поздрави одржувањето на фестивалот, нагласувајќи дека Битола и годинава продолжува со настани што го збогатуваат културниот и забавниот живот на градот.
„Битола има силна фестивалска традиција и публика која знае да ја живее градската атмосфера. Поддршката за вакви настани е поддршка за локалната култура, за туризмот и за угостителството. Но, овие урбани случувања носат препознатливост и за градот. Вински фестивал Битола се одржува првпат, но има потенцијал да стане дел од календарот на манифестации по кои градот ќе биде уште попривлечен за посетители“, истакна Коњановски.
Директорот на ЈОУ КИЦ Битола – Офицерски дом, Димитар Михајловски, посочи дека Офицерски дом е природна сцена за ваков тип настани, бидејќи претставува еден од најрепрезентативните простори во градот.
„Офицерски дом е простор кој има посебна симболика за Битола. Затоа ни е важно тука да привлечеме новите настани кои ја зближуваат публиката. Вински фестивал Битола носи токму таква енергија, културна, музичка и градска“, истакна Михајловски.
Претставникот на бендот „Паркети“ најави дека настапот на фестивалот ќе биде дел од финалната вечер и дека публиката може да очекува концертна енергија што одговара на отворениот, градски карактер на настанот.
Првото издание на Вински фестивал Битола ќе се одржи од 7 до 9 мај 2026 година, на платото пред Офицерски дом во Битола.
МОЖЕБИ ЌЕ ВЕ ИНТЕРЕСИРА:
