Денеска во светот се одбележува 9 Мај – Денот на победата над фашизмот, датум што го симболизира крајот на Втора светска војна во Европа и поразот на нацистичка Германија.
На 9 мај 1945 година, во разурнатиот Берлин беше потпишана безусловната капитулација на Трет Рајх, со што официјално заврши војната на европскиот континент. Во конфликтот учествувале 61 држава и околу 96 проценти од светското население, а животот го загубиле повеќе од 50 милиони луѓе.
Капитулацијата ја потпишале германските претставници Вилхелм Кајтел, Ханс Јирген Штумпф и Ханс Георг фон Фридебург, додека од страната на сојузниците документот го потпишале маршалот Георги Жуков и британскиот генерал Артур Тедер.
Според историските податоци, околу 20 милиони жртви биле од тогашниот Советски Сојуз, а повеќе од 30 милиони биле цивили.
Во нацистичките логори биле убиени околу 12,5 милиони луѓе, меѓу кои и шест милиони Евреи за време на Холокауст.
Војната на Далечниот Исток завршила неколку месеци подоцна, на 2 септември 1945 година, кога Јапонија капитулирала по атомските бомбардирања на Хирошима и Нагасаки.
Македонија за време на Втората светска војна била дел од антифашистичката коалиција. Според историчарите, во борбите загинале околу 33.000 луѓе, меѓу кои и повеќе од 7.000 македонски Евреи депортирани во логорот Треблинка.
По повод Денот на победата над фашизмот, денеска во Скопје се организираат повеќе комеморативни активности и положување цвеќе пред споменикот „Ослободители на Скопје“ и на партизанските гробишта во Бутел.
МОЖЕБИ ЌЕ ВЕ ИНТЕРЕСИРА:
