Шкендија Арачиново и Скопје од следната сезона ќе играат во македонската Прва лига, откако денеска ги добија бараж натпреварите за пласман во елитното друштво.
Најголема драма се случуваше во Кавадарци, каде што Шкендија Арачиново по подобро изведување на пенали го елиминира Пелистер и испиша историски успех со прв пласман во највисокиот ранг на македонскиот фудбал.
Тимот од Арачиново беше подобар противник во најголемиот дел од натпреварот и заслужено поведе во 53. минута преку Назифи, кој по одличен соло-продор ја затресе мрежата на битолчани.
Пелистер имаше голема можност да се врати во игра во 66. минута, кога доби пенал, но капитенот Ивановски не успеа да го совлада голманот Столевски. Во продолжението од акцијата, тој не реализираше ниту од непосредна близина.
Кога изгледаше дека Шкендија ќе ја обезбеди победата во регуларниот тек, Пелистер стигна до израмнување во самиот финиш. Петар Петковски најдобро се снајде во шеснаесетникот и со удар со глава погоди за 1-1.
Победникот беше решен по изведување пенали, каде што следуваше вистински трилер. Давид Анѓелески прв промаши кај Пелистер, а потоа Кире Ристевски не беше прецизен, иако неговиот удар беше повторен поради нерегуларно движење на голманот, по што успеа да погоди.
Конечната радост за Шкендија Арачиново ја донесе Дервиши, кој беше сигурен во осмата серија, додека голманот Столевски беше еден од хероите со дури четири одбранети пенали.
Во вториот бараж натпревар, одигран во Битола, Скопје со минимални 1-0 ја совлада Брера и по три години повторно се враќа во Првата лига.
Иако долго време немаше голови, Скопје беше поконкретен ривал и создаде повеќе шанси. Ангелов не успеа да реализира пенал во завршницата, но неколку минути подоцна Трајчевски стана херој на скопскиот состав. По корнер и мешаница пред голот на Брера, тој најдобро се снајде и го постигна победничкиот погодок.
Со тоа, Шкендија Арачиново и Скопје обезбедија место во Првата македонска фудбалска лига за следната сезона, каде претходно пласман преку второлигашката конкуренција избори и Брегалница.
МОЖЕБИ ЌЕ ВЕ ИНТЕРЕСИРА:
