Првиот што јавно го потврди ваквиот чекор беше Рафаел Леао, чија ера во дресот на Милан очигледно се приближува кон крајот. По седум години во клубот, португалскиот офанзивец порача дека сака промена на средината и нови предизвици, што отвора период на голема неизвесност на „Сан Сиро“.
По комплицирана сезона во која дел од навивачите му свртеа грб и имаше и свирежи од трибините, Леао донел одлука да се раздели со клубот. Според информациите, тој веќе разгледува опции за трансфер во странство, додека Милан за неговите услуги бара најмалку 50 милиони евра. Засега интерес има од Турција, од Галатасарај и Фенербахче, кои наводно нудат плата од околу 10 милиони евра годишно.
Португалецот во изјава за медиумите истакна дека верува оти го дал максимумот за Милан и дека е горд на периодот поминат во клубот. Тој додаде дека секој фудбалер има амбиции и дека неговата желба е нов предизвик во друга лига, а конечната одлука ќе ја донесе по Светското првенство во 2026 година.
Леао пристигна во Милан во 2019 година од Лил во трансфер вреден 35 милиони евра и за кратко време се етаблираше како еден од најдобрите крилни напаѓачи во Европа. Беше клучна фигура во освојувањето на титулата во Серија А во сезоната 2021/22, кога беше прогласен и за најдобар играч во лигата. За клубот одигра повеќе од 200 натпревари, со над 50 голови и повеќе од 40 асистенции, а стигна и до полуфинале на Лигата на шампионите во 2023 година.
Во тековната сезона, Леао има 10 голови и три асистенции на 31 натпревар, учинок кој се оценува како под очекувањата за неговото реноме. Сепак, неговото име и понатаму е меѓу најбараните на европскиот пазар, со интерес и од врвни лиги, но и од Саудиска Арабија.
Паралелно со неговата ситуација, во клубот се отвораат прашања и околу иднината на повеќе клучни фудбалери. Лука Модриќ е пред дилема дали да продолжи или да го напушти Милан, особено по разочарувачката сезона и истекувањето на договорот на крајот од јуни. Неговата иднина била дополнително поврзана со тренерскиот и спортскиот менаџмент во клубот, а сега ситуацијата е уште понеизвесна.
Адриен Рабјо исто така е спомнат како играч кој би можел да замине по само една сезона, со интерес од неколку клубови, меѓу кои и Наполи. Милан би барал околу 15 милиони евра за негов трансфер.
Под знак прашалник е и иднината на голманот Мајк Мењан, кој неодамна го продолжи договорот, но сега повторно ја разгледува својата позиција по промените во спортската структура. И покрај тоа, неговото заминување би било комплицирано поради долгорочниот договор и високата плата.
Милан, според италијанските медиуми, би можел да влезе во поширока реконструкција на тимот, со можни продажби на повеќе играчи со цел финансиско стабилизирање по период без настапи и приходи од Лигата на шампионите.
МОЖЕБИ ЌЕ ВЕ ИНТЕРЕСИРА:
