Времето денеска ќе биде сончево и топло со мала до умерена облачност, а во попладневните часови се очекува локална нестабилност проследена со пороен дожд, грмежи и засилен ветер. Од Управата за хидрометеоролошки работи информираат дека на поединечни места ќе има услови и за изолирано невреме со појава на град.
Утринските температури ќе се движат од 9 до 19 степени, додека максималните дневни ќе достигнат меѓу 25 и 34 степени Целзиусови.
Во Скопје ќе преовладува сончево и топло време со мала до умерена облачност. Во одделни делови од котлината попладне се можни краткотрајни врнежи од дожд, проследени со грмежи и засилен ветер.
Според прогнозите, и во наредните денови ќе се задржи претежно сончево време, но во попладневните часови ќе има услови за развој на нестабилна облачност со локални поројни врнежи, грмежи и засилен ветер.
Метеоролозите предупредуваат дека на одредени места временските процеси може да бидат поинтензивни, со пообилен дожд и можност за појава на изолирано невреме проследено со град.
Во четврток се очекува промена на временските услови со зголемена облачност и намалување на температурите за неколку степени. Ќе дува засилен, а повремено и силен северозападен ветер, кој на одделни места ќе достигнува брзина до 60 километри на час.
МОЖЕБИ ЌЕ ВЕ ИНТЕРЕСИРА:
