Градоначалникот на Скопје, Орце Ѓорѓиевски, заедно со градоначалникот на Општина Бутел, Дарко Костовски, извршија увид во градежните активности за изградба на нов мега парк долж булеварот „Христијан Тодоровски – Карпош“.
Станува збор за локација која со години била запуштена и претставувала неискористен простор, а со новиот проект ќе биде претворена во современ зелен центар наменет за рекреација, одмор и дружење на граѓаните.
Новиот парк ќе се простира на површина од 8.000 квадратни метри и ќе содржи зелени површини, плоштад, детски катчиња, пешачки патеки, фитнес-зони и други содржини наменети за сите генерации.
При увидот беше истакнато дека ваквите проекти претставуваат значајна инвестиција во подобрувањето на квалитетот на животот, заштитата на животната средина и создавањето нови јавни простори за граѓаните.
Проектот е дел од програмата за изградба на четири мега паркови на територијата на Скопје. Паралелно со нив, предвидена е реализација на околу 50 помали паркови во сите скопски општини, од кои дел веќе се во фаза на изградба.
Ѓорѓиевски и Костовски нагласија дека развојот на зелената инфраструктура останува меѓу главните приоритети, со цел создавање подобри услови за живот и повеќе јавни зелени површини за граѓаните.
Со реализацијата на проектот, Бутел ќе добие нова зелена оаза, додека Скопје уште еден модерен јавен простор што ќе придонесе за поздрава и поквалитетна урбана средина.
МОЖЕБИ ЌЕ ВЕ ИНТЕРЕСИРА:
