Градот Скопје денеска официјално го означи почетокот на санацијата на мостот „Естакада“ во општина Гази Баба, еден од најзначајните и најфреквентни сообраќајни објекти во главниот град.
На почетокот на градежните работи присуствуваа градоначалникот на Скопје и градоначалникот на Гази Баба, Бобан Стефковски, кои истакнаа дека станува збор за долгогодишно барање на граѓаните и проект од големо значење за безбедноста и непреченото одвивање на сообраќајот.
Мостот „Естакада“ претставува една од клучните сообраќајни врски на источниот влез и излез од градот, по која секојдневно се движат илјадници граѓани, ученици, работници и превозници.
Со проектот е предвидена санација на пристапните рампи на површина од околу 10.000 квадратни метри. На 3.800 квадратни метри ќе се изврши целосно отстранување на постојниот коловоз и поставување на два нови асфалтни слоја, додека на самиот мост ќе биде нанесен нов асфалтен слој.
Покрај тоа, ќе се заменат рабниците, ќе се изградат нови асфалтни тротоари, ќе се изврши чистење, санација и бојадисување на заштитната пешачка ограда, како и замена на капаците на шахтите.
Вкупната должина на делницата што ќе биде опфатена со реконструкцијата изнесува 1,5 километри.
Од Град Скопје посочуваат дека проектот претставува инвестиција во поголема безбедност, подобра поврзаност и поквалитетни услови за секојдневно движење на граѓаните, најавувајќи продолжување на активностите за санација и модернизација на останатите мостови и сообраќајни објекти во градот.
МОЖЕБИ ЌЕ ВЕ ИНТЕРЕСИРА:
