Основното јавно обвинителство за гонење на организиран криминал и корупција отвори истражна постапка против пет лица од Скопје, на возраст од 22 до 34 години, поради сомнение дека сториле кривично дело поврзано со терористичка организација.
Постапката е покрената по кривична пријава поднесена од Министерството за внатрешни работи, а предметот е резултат на координирани активности реализирани од Секторот за борба против тероризам, насилен екстремизам и радикализам и Агенцијата за национална безбедност, под раководство на надлежен јавен обвинител.
Според досегашните сознанија од истрагата, првоосомничениот кон крајот на 2024 година формирал интернет канал и група на социјална мрежа во која членувале и останатите осомничени. Во текот на 2025 и 2026 година, преку тие комуникациски канали биле споделувани и дистрибуирани материјали со кои се поддржувала и промовирала идеологијата на ИСИС, како и други идеолошки поврзани терористички организации.
Според Обвинителството, целта на активностите била ширење пропаганда, идеолошка индоктринација и величење на терористички дејствија и нивни извршители.
Во рамки на акцијата, по наредба на судија на претходна постапка, биле извршени претреси на пет локации на подрачјето на Скопје. Три од нив биле во Казнено-поправната установа Идризово, каде што двајца од осомничените издржуваат затворски казни за други кривични дела, а еден се наоѓа во притвор. Дополнително, претреси биле спроведени и на уште две локации поврзани со останатите осомничени лица.
При акцијата биле пронајдени и одземени повеќе електронски уреди и други предмети кои ќе бидат предмет на вештачење и понатамошна анализа во рамки на доказната постапка.
Судијата на претходна постапка при Основниот кривичен суд Скопје делумно го прифатил предлогот на обвинителството, при што на еден од осомничените му е определена мерка притвор, додека на друг му е изречена мерка куќен притвор. Истрагата продолжува со цел целосно утврдување на сите околности и евентуална кривична одговорност на инволвираните лица.
МОЖЕБИ ЌЕ ВЕ ИНТЕРЕСИРА:
