Во пукање што денеска околу 16 часот се случило во кафуле во населбата Кумодраж во Белград, животот го загубил 46-годишниот Дарко Весковиќ, познат по прекарот Прика, додека уште едно лице е тешко повредено.
Според информациите од српските медиуми, напаѓачот веднаш по инцидентот избегал, а полицијата започнала обемна потрага и ја активирала акцијата „Вихор“. На местото на настанот се распоредени бројни полициски екипи, додека форензичарите вршат увид.
Неофицијално, осомничениот е опишан како лице со послаба градба, кое во моментот на нападот носело црна маица, фармерки, црни патики и беж капа.
Според медиумските извештаи, безбедносните камери го забележале моментот на нападот. Весковиќ наводно станал да го поздрави лицето кое влегло во локалот, а по краток контакт напаѓачот извадил пиштол и испукал повеќе куршуми. Потоа пукал и кон Вук М. (49), кој седел на истата маса, при што му нанел тешки повреди.
Во кафулето во тој момент имало и други гости, но според досегашните информации, никој друг не е повреден.
Дарко Весковиќ и претходно бил во фокусот на јавноста, бидејќи бил обвинет во случајот со убиството на Блаж Ѓуровиќ во 2018 година. По извршувањето на делото бил недостапен за српските органи, поради што била распишана меѓународна потерница, а подоцна бил уапсен во Загреб во соработка меѓу српската и хрватската полиција.
Според претходни медиумски информации, Весковиќ се поврзувал со криминалната група Шкаља и со Лука Бојовиќ и Филип Кораќ, додека Блаж Ѓуровиќ се споменувал како припадник на спротивставената криминална група Кавач. Овие наводи се дел од претходни медиумски извештаи.
МОЖЕБИ ЌЕ ВЕ ИНТЕРЕСИРА:
