Извршниот одбор на СДСМ донесе одлука јавно да ги повика сите поединци и групи кои имаат забелешки или предлози за работата на партијата на внатрешна дебата, со цел, како што наведуваат, заеднички да се разговара за идните чекори и политичката борба против актуелната власт.
Од партијата посочуваат дека сите прашања поврзани со СДСМ треба да се решаваат во рамките на партиските органи и тела, а не преку јавни настапи, медиуми или надворешни иницијативи.
„Секоја дебата која се однесува на СДСМ треба да се води во партијата, пред органите и телата, а не надвор од неа“, наведуваат од Извршниот одбор.
Од СДСМ изразија загриженост за економската состојба во државата, оценувајќи дека животниот стандард на граѓаните се влошува, а владините политики, според нив, водат кон нови задолжувања.
Партијата најавува дека ќе продолжи со критика на економските и политичките потези на Владата предводена од Христијан Мицкоски, обвинувајќи ја за погрешни политики и лошо управување.
Во соопштението се наведува дека СДСМ се подготвува за „силна, бескомпромисна и организирана борба“ против политиките на ВМРО-ДПМНЕ, а членството е повикано на единство и активирање.
„Вратите на СДСМ се отворени за секој што ѝ мисли добро на партијата и што споделува прогресивни вредности“, велат од партијата.
Од СДСМ додаваат дека различните мислења ги гледаат како предност, но дека крајната цел треба да остане заедничка – консолидација на партијата и подготовка за идните политички предизвици.
МОЖЕБИ ЌЕ ВЕ ИНТЕРЕСИРА:
