СДСМ побара целосно расчистување на случајот со бегството на лице приведено за трговија со дрога од Полициската станица во Кочани, оценувајќи дека настанот отвора сериозни сомнежи за пропусти во работата на полицијата и можна поврзаност со криминални структури.
Од партијата велат дека министерот за внатрешни работи Панче Тошковски мора да даде одговори за тоа кој е одговорен за бегството на приведениот, како и дали постојат пропусти или злоупотреби во постапувањето на полициските службеници.
СДСМ поставува повеќе прашања, меѓу кои и дали началникот на ОВР Кочани, Тоше Стојанов, има каква било поврзаност со приведеното лице, кое, според нив, се поврзува и со дискотеката „Пулс“ во Кочани. Од партијата прашуваат и каква е поврзаноста на лицето со пратеникот од ВМРО-ДПМНЕ, Миле Лефков, наведувајќи дека во јавноста постојат фотографии на кои се заедно.
Во соопштението се бара да се утврди како приведениот успеал да избега од полициската станица, зошто не бил сместен во просториите за задржување и дали некој му помогнал при бегството.
Според СДСМ, доколку е точно дека обвинителството подготвувало предлог за определување мерка притвор, случајот е уште посериозен и бара итна и темелна истрага.
Партијата бара да се утврди одговорност кај сите инволвирани службени лица, вклучително и кај раководството на ОВР Кочани.
Во соопштението СДСМ оценува дека по две години мандат на министерот Тошковски, Министерството за внатрешни работи се соочува со серија скандали кои, според нив, ја нарушуваат безбедноста и довербата на граѓаните во институциите.
МОЖЕБИ ЌЕ ВЕ ИНТЕРЕСИРА:
