Јубилејното 20-то издание на Балканскиот етно-фјужн фестивал „Локум фест – музика и традиција“ ќе започне на 16 јули во Античкиот театар во Хераклеја, со спектакуларен настап на грчкиот ансамбл „10-те бузуки на Домна“.
Под отворено небо, со почеток во 21 часот, публиката ќе има можност да ужива во уникатен музички спој на традицијата, емоцијата и виртуозноста, преку звуците на десет бузуки, гитара, контрабас, вокални изведби и настап на танцувачка група.
Ансамблот „10-те бузуки на Домна“ е еден од познатите грчки состави посветени на традиционалната и современата грчка музика, со посебен акцент на инструментот бузуки. Составот е основан од Јанис Карасавас, а го сочинуваат врвни музичари и мајстори на овој препознатлив грчки инструмент.
Нивниот репертоар опфаќа ребетико, лаико, народни песни од различни делови на Грција, но и современи композиции инспирирани од традиционалните музички форми. Со своите настапи во Грција и странство, ансамблот е препознатлив по енергичната интерпретација, автентичниот израз и виртуозните изведби.
Организаторите посочуваат дека една од главните цели на фестивалот е зајакнување на пограничната културна соработка и развој на културниот туризам преку промоција на традицијата и културното наследство. Настапот на грчкиот ансамбл е реализиран во соработка со Амбасадата на Република Грција во Скопје и Генералниот конзулат во Битола.
„Локум фест“ е проект од национален интерес, поддржан од Министерството за култура и туризам и Општина Битола, а се одржува во рамки на „Бит фест 2026“.
Фестивалот ќе трае од 16 до 18 јули. По отворањето во Хераклеја, втората и третата фестивалска вечер ќе бидат одржани во автентичниот амбиент на Старата битолска чаршија – местото каде што пред две децении започна приказната за „Локум фест“.
МОЖЕБИ ЌЕ ВЕ ИНТЕРЕСИРА:
