Во населеното место Марино започна реконструкцијата на мултинаменското спортско игралиште, проект со кој жителите ќе добијат модерен, безбеден и функционален простор за спорт и рекреација.
Од Општина Илинден информираат дека реконструкцијата опфаќа целосна обнова на теренот и спортската инфраструктура. Предвидено е поставување нова пластифицирана заштитна мрежа, бојадисување на металната конструкција, замена на кошаркарските табли и обрачите, поставување нови столбови и анкерни плочи, монтажа на заштитна 2Д-мрежа, набавка на нови голови и поставување јутена мрежа зад нив.
Во рамките на проектот ќе бидат поставени и повеќе од 920 квадратни метри вештачка трева, како и над 430 квадратни метри ПП пластични плочки. Предвидена е и подготовка на асфалтната подлога, како и поставување нови метални профили, со што игралиштето ќе добие целосно нов изглед според современите технички стандарди.
Градоначалникот на Општина Илинден, Александар Георгиевски, истакна дека реконструкцијата ќе обезбеди квалитетни услови за спортување и рекреација на младите, спортистите и сите граѓани.
Од локалната самоуправа додаваат дека обновата на игралиштето во Марино е дел од пошироката стратегија за модернизација на спортската инфраструктура во сите населени места на територијата на Општина Илинден.
МОЖЕБИ ЌЕ ВЕ ИНТЕРЕСИРА:
