Американскиот претседател Доналд Трамп повторно упати остри закани кон Иран, предупредувајќи дека САД ќе извршат нови напади врз иранската инфраструктура доколку Техеран повторно нападне бродови во Ормускиот теснец.
Во објава на својата социјална мрежа Truth Social, Трамп порача дека секој иден напад врз пловила во Ормускиот теснец ќе биде проследен со американски воздушни удари врз мостови и електрани во Иран, вклучително и објекти во близина на Техеран.
„Од овој момент, секој пат кога Исламската Република Иран ќе пука врз брод во Ормускиот теснец, без разлика дали со ракета, дрон или какво било друго оружје, САД ќе бомбардираат и уништат еден мост или една електрана, вклучувајќи ги и оние што се наоѓаат во близина на главниот град Техеран или во самиот Техеран“, напиша Трамп.
Заканите следуваат по серијата ирански напади врз американски воени бази во регионот на Персискиот Залив. Во меѓувреме, американската војска продолжува со воздушни операции врз цели во Иран, а според медиумските извештаи, нападите траат веќе единаесетта ноќ по ред.
Изјавите на Трамп предизвикаа критики од дел од експертите за меѓународно право и светски лидери, кои предупредуваат дека нападите врз цивилна инфраструктура, како мостови и електрани, се спротивни на меѓународното хуманитарно право.
Говорејќи пред новинарите, американскиот претседател порача дека нападите ќе продолжат и оцени дека Иран ќе плати „висока цена“.
„Тие ќе платат висока цена, тие се десеткувани“, изјави Трамп.
На прашањето дали американската јавност ја поддржува воената кампања против Иран, Трамп рече дека Американците не се против војната и се повика на анкета која, според него, ја потврдува таквата оценка. Сепак, не прецизираше за кое истражување станува збор.
МОЖЕБИ ЌЕ ВЕ ИНТЕРЕСИРА:
