Огромна кражба во електровлечната подстаница „Драчево“ предизвика сериозна штета врз железничката инфраструктура. Од објектот, кој се наоѓа меѓу железничките станици Лисиче и Драчево во Скопје, биле украдени бакарни жици, шини и прачки, а според првичните проценки, директната материјална штета изнесува околу 5 милиони евра.
Од Министерството за транспорт и врски информираат дека со кражбата е уништен значаен дел од електроенергетската опрема, поради што подстаницата е доведена во состојба на целосна нефункционалност.
Според надлежните, сторителите насилно превртеле два големи електроенергетски трансформатори, секој со тежина поголема од 30 тони. Од нив било испуштено трансформаторското масло, а бакарните намотки и останатите вредни компоненти биле целосно отстранети и украдени.
Од Министерството оценуваат дека не станува збор само за обична кражба на метал, туку за сериозен напад врз критична инфраструктура и државен имот.
„Оштетувањето на објекти од ваков вид може да има сериозни последици врз безбедноста, стабилноста и нормалното функционирање на железничкиот сообраќај“, велат од Министерството за транспорт.
Оттаму апелираат до надлежните институции итно и темелно да го истражат случајот, да бидат откриени сторителите, како и сите лица вклучени во кражбата, транспортот и понатамошното отуѓување на украдената опрема.
МОЖЕБИ ЌЕ ВЕ ИНТЕРЕСИРА:
