Грција и натаму се бори со големи шумски пожари, а силните ветрови дополнително ја отежнуваат состојбата и го поттикнуваат ширењето на огнената стихија. Властите и денеска остануваат во состојба на висока готовност, додека најкритична е ситуацијата северозападно од Атина.
Огромни облаци чад се издигнуваат над регионот, а неколку села на околу 60 километри од грчката престолнина повторно се евакуирани како превентивна мерка.
Крајбрежната стража евакуираше 12 лица од плажа во заливот Порто Гермено, додека според локалните медиуми, најмалку десет куќи се уништени во пожарите.
Во гаснењето се вклучени околу 325 пожарникари и волонтери, 92 противпожарни возила, 18 авиони и седум хеликоптери. Полицијата работи на регулирање на сообраќајот во погодените подрачја, особено во близина на полуостровот Пелопонез, каде што пожарите се активни на повеќе фронтови.
Според противпожарната служба, само во текот на петокот биле регистрирани 73 пожари низ земјата.
Во меѓувреме, големиот пожар на јужен Крит е ставен под контрола, но околу 220 пожарникари и натаму остануваат на терен поради опасност од повторно активирање на жариштата. Гаснењето од воздух е ограничено поради силните ветрови, кои придонесуваат за појава на нови пожари.
Надлежните спроведуваат истрага за причините за избувнувањето на пожарите, а првичните сомнежи се дека еден од нив можеби бил предизвикан од оштетени далноводи.
Поради сериозната состојба, грчката цивилна заштита прогласи највисок степен на тревога за поширокиот регион на Атина и јужниот дел на островот Евбеја. Високо ниво на опасност останува и за Крит, Пелопонез, Кикладите, Хиос и Лезбос.
МОЖЕБИ ЌЕ ВЕ ИНТЕРЕСИРА:
