Во текот на наредните два дена, 456 онколошки пациенти ќе добијат еднократна парична помош, соопшти градоначалникот на Скопје, Орце Ѓорѓиевски.
Според неговата објава, средствата ќе бидат исплатени на сметките на сите пациенти чии барања се веќе обработени.
Ѓорѓиевски информира дека за финансиска поддршка аплицирале вкупно 1.200 онколошки пациенти, а обработката на преостанатите апликации е во тек.
Тој најави дека исплатата за сите кои поднеле барање ќе биде завршена во текот на наредната недела.
„Во миговите кога животот нè соочува со најтешките предизвици, наша обврска е да покажеме грижа и да бидеме поддршка за оние на кои им е најпотребна. Обезбедивме финансиска помош за лицата кои водат една од најтешките животни битки“, напиша Ѓорѓиевски.
Тој истакна дека оваа мерка има за цел да испрати порака дека пациентите не се сами во борбата со болеста и дека институциите треба да бидат нивна конкретна поддршка.
МОЖЕБИ ЌЕ ВЕ ИНТЕРЕСИРА:
