Роналд Араухо повеќе не може да го издржи притисокот и привремено нема да настапува за Барселона. Според шпанските медиуми, не е исклучено ова да значи и крај на неговата етапа во клубот, зависно од тоа како ќе се развие неговата ментална состојба во следниот период. Уругвајскиот дефанзивец самиот побарал да биде тргнат од составот.
Араухо веќе подолг период е на удар на критики поради нестабилните настапи, а ситуацијата кулминираше по натпреварот против Челзи минатиот викенд. Барселона загуби со 3:0, првиот гол беше резултат на негова лоша реакција, а поради прекумерен приговор доби жолт картон. Во 44-та минута направи прекршок врз Кукуреља, по што доби втор жолт и беше исклучен. Во второто полувреме Барса со играч помалку прими уште два гола.
По натпреварот следуваше силен бран критики, а клубот официјално соопшти дека Араухо ќе го пропушти дуелот со Алавес поради стомачни проблеми. Сепак, подоцна стана јасно дека причината е многу посериозна.
Тренерот Ханси Флик на прес-конференција пред дербито со Атлетико Мадрид изјави дека Араухо нема да биде во составот „поради лични причини“, а медиумите во Шпанија брзо открија дека станува збор за ментален притисок и психичка исцрпеност.
Во понеделникот Араухо пристигнал на тренинг, но не работел со екипата. Наместо тоа, имал разговор со раководството и тренерскиот тим во присуство на своите агенти. Им објаснил дека не се чувствува психички подготвен да продолжи, иако физички е целосно здрав. Оценил дека во таква состојба би бил товар за тимот и дека тоа не е фер кон неговите соиграчи.
Клубот му понудил целосна поддршка и му одобрил неопределен период на одмор за да закрепне и да се стабилизира.
Шпанските медиуми пренесуваат дека постои реална можност Араухо да ја напушти Барселона во летниот преоден рок, доколку неговата состојба не се подобри или доколку самиот побара промена на средината.
МОЖЕБИ ЌЕ ВЕ ИНТЕРЕСИРА:
