Силниот раст на цената на нафтата продолжи и синоќа бидејќи руско-украинскиот воен конфликт донесе паника на пазарот и страв од можен недостиг. Американската нафта WTI скокна на највисокото ниво од 2013 година за време на вечерашното тргување, додека глобалната референтна марка, европската нафта Брент, надмина 110 долари за барел поради силната побарувачка.
Суровата нафта WTI порасна за повеќе од 5,0 отсто на 109,23 долари за барел, што е највисоко ниво од септември 2013 година, а цената на брент порасна за 5,6 отсто на 110,84 долари за барел, што е ниво невидено од јули 2014 година, пренесе CNBC.
Високата цена на „црното злато“ доаѓа во време кога Организацијата на земјите извознички на нафта (ОПЕК) и нејзините сојузници, вклучително и Русија, се подготвуваат да одржат состанок во среда за да разговараат за планот за производство за април.
И двата вида нафта, WTI и Brent, минатиот четврток го надминаа нивото од 100 долари, за прв пат од 2014 година, откако Русија ја нападна Украина, што предизвика страв од нарушување на снабдувањето на пазарот, кој и онака страда од недоволно снабдување.
