Данскиот фудбалер Кристијан Ериксен, кој се онесвести за време на пријателскиот натпревар против Украина, се чувствува добро и наскоро ќе ја напушти болницата, соопшти лекарот на данската репрезентација, Мортен Боесен.
„Разговарав со Кристијан утрово и тој е добро. Со своето семејство е и е во добро расположение. Се очекува наскоро да биде отпуштен и да се врати дома. Се грижиме за играчите и стручниот штаб и сме во постојан контакт со нив“, изјави Боесен.
Пријателскиот натпревар меѓу Данска и Украина беше прекинат во 65. минута во Оденсе, откако Ериксен се струполи на теренот. Медицинскиот тим веднаш интервенирал и му укажал помош.
По интервенцијата, 34-годишниот фудбалер самостојно го напуштил теренот и бил пренесен на дополнителни прегледи во Универзитетската болница во Оденсе.
Данските медиуми потсетуваат дека Ериксен доживеа срцев застој за време на натпреварот на Европско првенство 2021 против Финска, кога благодарение на брзата реакција на медицинскиот тим му беше спасен животот.
По тој инцидент, на Ериксен му беше вграден специјален кардиовертер-дефибрилатор, уред што го следи срцевиот ритам и автоматски реагира при опасни нарушувања. Данскиот репрезентативец успешно се врати на фудбалските терени во 2022 година.
МОЖЕБИ ЌЕ ВЕ ИНТЕРЕСИРА:
