Невладината организација „Здрава котлина“ упати остар јавен апел до претседателката Гордана Сиљановска Давкова, барајќи да не го потпише законот поврзан со рударските концесии и да застане, како што велат, на страната на граѓаните и Уставот.
Од организацијата оценуваат дека со новото законско решение се отвора можност концесионерите да добијат дозволи за работа и пред да ги решат имотно-правните односи, што според нив претставува директно нарушување на правото на сопственост. Тие предупредуваат дека ваквите измени може да доведат до правна несигурност и конфликти на терен.
Во апелот се посочува дека граѓаните од Струмица, Гевгелија, Валандово и Прилеп веќе се мобилизираат и најавуваат реакции доколку законот биде потпишан. Организацијата предупредува на можни протести и блокади, потенцирајќи дека станува збор за прашања поврзани со животната средина, водата и здравјето на населението.
„Здрава котлина“ бара претседателката да го искористи правото на вето и да спречи, како што наведуваат, носење закон донесен без доволна јавна расправа и во корист на приватни интереси. Воедно, порачуваат дека граѓаните нема да прифатат одлуки кои, според нив, можат да имаат долгорочни последици врз животната средина и локалната економија.
МОЖЕБИ ЌЕ ВЕ ИНТЕРЕСИРА:
