Еквадор и Курасао ги поделија бодовите во натпреварот од второто коло на Светското првенство, одигрувајќи без голови (0:0) на стадионот во Канзас.
Од самиот старт Еквадор ја презеде иницијативата и создаде голем број шанси, но одбраната на Курасао, предводена од извонредниот голман Елој Ром, успеа да одолее на сите напади.
Притисокот продолжи и во второто полувреме, кога Еквадор целосно доминираше на теренот, но Ром беше несовладлив. Со фантастична партија и дури 15 успешни интервенции, тој му донесе историски бод на својот тим – прв освоен бод на Курасао на светските првенства.
За својот настап Ром доби максимална оценка 10 од „Софаскор“, а неговите 15 одбрани се меѓу најдобрите голмански изданија во историјата на Мундијалите. Единствено повеќе интервенции има Тим Хауард, кој во 2014 година запиша 16 одбрани, но во натпревар што траеше 120 минути.
По две одиграни кола, Еквадор и Курасао имаат по еден бод и во последното коло ќе мора да победат доколку сакаат да останат во игра за пласман во осминафиналето.
Германија веќе обезбеди место во нокаут-фазата со максимални шест бодови, додека Брегот на Слоновата Коска има три. Во последното коло ќе се играат дуелите Еквадор – Германија и Брегот на Слоновата Коска – Курасао.
МОЖЕБИ ЌЕ ВЕ ИНТЕРЕСИРА:
