Годинашното полагање на државната матура помина со значително помал број нерегуларности и подобра организација во споредба со претходните години, оцени министерката за образование и наука Весна Јаневска.
Одговарајќи на новинарски прашања, таа истакна дека најголемиот дел од матурантите пристапиле одговорно кон испитите, додека организацијата била спроведена на високо ниво.
„Можеме да кажеме дека оваа година државната матура помина во најдобар ред и мир. Испитите беа организирани на соодветен начин, најчесто во големи простории, каде што можностите за нерегуларности беа сведени на минимум“, изјави Јаневска.
Според министерката, бројот на ученици кои биле отстранети од полагањето поради препишување е значително помал во однос на минатите години.
„Во двата испитни термина отстранети се околу шеесет ученици, што претставува сериозен напредок во спроведувањето на државната матура“, посочи таа.
Јаневска појасни дека станува збор за матуранти кои биле затекнати при препишување и веднаш биле исклучени од испитниот процес. Сепак, тие ќе имаат можност повторно да полагаат во следниот испитен рок што ќе се одржи во август.
Министерката се осврна и на новините воведени оваа година, посочувајќи дека за првпат бил применет модел со два вида државна матура, усогласени со различните наставни програми. Според неа, на овој начин е надмината досегашната нерамноправност меѓу учениците и е обезбеден поправеден пристап во оценувањето на нивните знаења.
МОЖЕБИ ЌЕ ВЕ ИНТЕРЕСИРА:
