Премиерот Христијан Мицкоски денеска при посетата на Битола порача дека Владата останува посветена на реализација на проекти кои имаат директно влијание врз квалитетот на живот на граѓаните, со посебен акцент на инфраструктурните инвестиции.
За време на увидот во реконструкцијата на објектот кој ќе биде дел од подрачното основно училиште „Коле Канински“ во населбата Буковски Ливади, Мицкоски истакна дека и покрај наследените предизвици, Владата продолжува со работа според утврдените приоритети.
„Продолжуваме да бидеме посветени на испорачување проекти како наш врвен приоритет. Не можеме преку ноќ да ги исправиме пропустите создадени со години, но вложуваме максимални напори да ги решаваме најважните прашања за граѓаните. Оној што работи понекогаш и греши, но најважно е да има резултати“, изјави Мицкоски.
Министерката за образование и наука Весна Јаневска посочи дека во Битола моментално се реализираат повеќе од 16 инфраструктурни проекти во областа на образованието. Таа информираше дека во изминатите две години во градот се вложени над 450 милиони денари за училишта, спортски сали и други образовни објекти, а најави и реконструкција на Студентскиот дом и Ресурсниот центар.
Градоначалникот на Битола, Тони Коњановски, информираше дека реконструкцијата на училиштето во Буковски Ливади ќе чини 31 милион денари, средства обезбедени преку Министерството за образование и наука. Тој додаде дека во градот продолжува и инвестицискиот циклус во училишната спортска инфраструктура, со изградба на 24 спортски сали во основните училишта, проект вреден над 4,5 милиони евра.
Во рамки на посетата на Битола, владината делегација предводена од премиерот Мицкоски ја посети и компанијата „Кромберг и Шуберт“.
МОЖЕБИ ЌЕ ВЕ ИНТЕРЕСИРА:
