Премиерот Христијан Мицкоски ги повика СДСМ и Левица да постигнат договор околу измените на Изборниот законик, порачувајќи дека владејачкото мнозинство ќе го поддржи секој усогласен предлог, доколку ги содржи препораките на ОБСЕ/ОДИХР и решението за гласањето на дијаспората.
Говорејќи по средбата со еврокомесарката за проширување Марта Кос, Мицкоски оцени дека последните реакции на опозициските партии претставуваат „политичка гимнастика и естрада“, наменета за нивните поддржувачи. Тој нагласи дека на новиот Изборен законик со месеци работеле сите пратенички групи во Собранието и дека текстот бил усогласен од речиси сите политички партии.
Мицкоски повтори дека ставот на власта бил јасно пренесен и на последната координација во Собранието, нагласувајќи дека Владата е подготвена да го прифати секој договорен текст што ќе биде резултат на консензус меѓу опозициските партии, доколку ги вклучува препораките на ОБСЕ/ОДИХР и гласањето на дијаспората.
Премиерот предупреди дека времето за исполнување на реформските обврски истекува и дека доколку измените не бидат усвоени до средината на јули, државата ризикува да изгуби повеќе од четири милиони евра финансиска поддршка.
Во меѓувреме, од СДСМ обвинија дека на Мицкоски и на ВМРО-ДПМНЕ не им се приоритет изборните реформи, туку, како што тврдат, создавање услови за изборни манипулации со гласовите на дијаспората.
МОЖЕБИ ЌЕ ВЕ ИНТЕРЕСИРА:
