Премиерот и лидер на ВМРО-ДПМНЕ, Христијан Мицкоски, во своето обраќање порача дека партијата во периодот од 2017 до почетокот на 2019 година била изложена на силни политички притисоци и прогон, додавајќи дека во тој период постоеле и иницијативи од тогашното раководство на СДСМ за законско укинување на името ВМРО.
Осврнувајќи се на развојот на партијата, Мицкоски истакна дека денес, осум години подоцна, ВМРО-ДПМНЕ останува значаен политички фактор, нагласувајќи дека историјата е најдобриот показател за издржливоста и континуитетот на организацијата.
Тој оцени дека патот на историското ВМРО, исполнет со подеми, предизвици и нови почетоци, довел до формирањето на ВМРО-ДПМНЕ на 17 јуни 1990 година. Според него, партијата е дел од подолга историска традиција и претставува продолжение на идејата на ВМРО.
Мицкоски нагласи дека уште од самото основање партијата се соочувала со бројни притисоци, уцени и обиди за дискредитација, но успеала да опстане благодарение на поддршката од членството и својата идеолошка определба.
Според него, врската со историското ВМРО не е само симболична, туку претставува темелна вредност врз која се гради политичкото дејствување на партијата во изминатите децении.
Во обраќањето тој ја опиша ВМРО-ДПМНЕ како повеќе од политичка партија, нарекувајќи ја „најголем македонски бренд“ и идеја која опстојува низ различни историски периоди.
Мицкоски порача дека суштината на таа идеја е Македонија да биде самостојна, достоинствена и почитувана држава, додавајќи дека обврска на партијата е таа визија да ја претвора во конкретни политики и резултати за граѓаните.
МОЖЕБИ ЌЕ ВЕ ИНТЕРЕСИРА:
