Учениците кои не успеаја да се запишат во средно училиште во првиот уписен рок за учебната 2026/2027 година ќе добијат нова можност оваа недела, информира Министерството за образование и наука.
Второто пријавување во јунскиот рок ќе се реализира електронски на 23 јуни. По поднесувањето на електронската апликација, кандидатите ќе треба на 24 јуни да ја достават потребната документација во избраното училиште.
Ранг-листите ќе бидат објавени на 25 јуни до 12 часот, во училиштата и на нивните официјални интернет-страници. Доколку во некое училиште има кандидати со ист број бодови, квалификациското тестирање ќе се одржи на 29 јуни, кога ќе бидат објавени и конечните резултати.
Според Министерството, во вториот уписен рок се достапни вкупно 11.882 слободни места. Од нив, 7.404 се наменети за настава на македонски јазик, 4.002 за настава на албански, 456 за турски и 20 за настава на српски јазик.
Во првото пријавување електронски аплицирале 15.075 ученици, а успешно биле запишани 13.397 кандидати.
МОЖЕБИ ЌЕ ВЕ ИНТЕРЕСИРА:
