Претседателот на Стопанската комора Бранко Азески е избран за вршител на должност претседател на Коморскиот инвестициски форум (КИФ), регионална организација што ги обединува стопанските комори од Западен Балкан.
Одлуката е донесена едногласно на седницата одржана во Белград, каде на Азески му е доверен мандат за спроведување на структурни измени во КИФ и во Бизнис советот, кој го сочинуваат најголемите компании од регионот.
Од Стопанската комора информираат дека на седницата биле усвоени и други иницијативи, меѓу кои и подготовка на студија за формирање Регионален тренинг и сертификационен центар. Проектот ќе биде поддржан од Германската развојна банка (KfW).
Азески има долгогодишно искуство во регионалната коморска соработка. Тој двапати ја предводел Асоцијацијата на балкански комори, веќе 11 години ја извршува функцијата потпретседател на КИФ, а повеќе од две децении е претседател на Стопанската комора.
Коморскиот инвестициски форум, со седиште во Трст, е основан во 2015 година во рамки на Берлинскиот процес. Организацијата претставува глас на приватниот сектор во регионот и застапува околу 350.000 компании од Западен Балкан, со цел унапредување на економската соработка и заеднички регионални иницијативи.
МОЖЕБИ ЌЕ ВЕ ИНТЕРЕСИРА:
