Убиството на Алекс Прети претставува срцепарателна трагедија и сериозен аларм за американското општество, порача поранешниот претседател на САД, Барак Обама. Тој истакна дека, без разлика на партиската припадност, секој Американец треба да биде загрижен поради сè почестите напади врз темелните вредности на нацијата.
Обама нагласи дека федералните органи за спроведување на законот и имиграциските служби имаат сложена и одговорна задача, но граѓаните очекуваат тие да ја извршуваат во рамки на законот, одговорно и во соработка со државните и локалните власти, а не во судир со нив. Според него, токму таквата соработка е клучна за обезбедување на јавната безбедност, нешто што, како што вели, не се случува во Минесота.
Поранешниот американски претседател посочи дека со недели јавноста е згрозена од дејствувањето на маскирани припадници на ИЦЕ и други федерални агенции, кои, според него, работат без одговорност и користат тактики што делуваат заплашувачки, провокативно и опасно за жителите на голем американски град. Тој потсети дека овие методи биле остро критикувани и од поранешни високи функционери, кои ги оцениле како срамни, беззаконски и сурови.
Обама оцени дека ваквото однесување кулминирало со смртоносни пукања во кои животот го загубиле двајца американски државјани – Алекс Прети и Рене Гуд. Дополнително загрижува, според него, тоа што актуелната администрација, наместо да воспостави дисциплина и одговорност кај агентите, настојува да ја ескалира ситуацијата, нудејќи јавни објаснувања кои не се поткрепени со сериозна истрага и, како што тврди, се спротивни на постојните видео-докази.
„Ова мора да престане“, порача Обама, изразувајќи надеж дека по оваа трагедија ќе следи преиспитување на пристапот на администрацијата и воспоставување конструктивна соработка со гувернерот Тим Волц, градоначалникот Џејкоб Фреј и со државната и локалната полиција, со цел да се спречи понатамошен хаос и да се постигнат легитимни цели во спроведувањето на законот.
МОЖЕБИ ЌЕ ВЕ ИНТЕРЕСИРА:
