САД најавија повлекување на околу 5.000 војници од Германија во наредните шест до дванаесет месеци, потврди Пентагон.
Одлуката ја донел американскиот секретар за одбрана Пит Хегсет, по „темелна ревизија“ на распоредот на силите во Европа. Германија и натаму останува најголем домаќин на американски трупи на континентот, со над 36.000 војници стационирани во различни бази.
Повлекувањето доаѓа во период на зголемени тензии меѓу Доналд Трамп и германскиот канцелар Фридрих Мерц, особено околу прашањата поврзани со конфликтот со Иран. Мерц неодамна оцени дека САД немаат јасна стратегија, по што Трамп возврати со критики за германската политика и економија.
Американскиот претседател најави дека може да разгледа и дополнително намалување на военото присуство во Италија и Шпанија, обвинувајќи ги дека не ја поддржале американската позиција околу Ормуски теснец.
Овој потег, според аналитичарите, може дополнително да ги продлабочи разликите меѓу НАТО сојузниците.
Инаку, ова не е прв обид за намалување на американското воено присуство во Германија. Во 2020 година, Доналд Трамп предложи повлекување на околу 12.000 војници, но планот беше стопиран и подоцна поништен од администрацијата на Џо Бајден. Новата одлука, сепак, веќе се третира како конкретна мерка што треба да се реализира во наредната година.
МОЖЕБИ ЌЕ ВЕ ИНТЕРЕСИРА:
