Ден по убедливата победа на изборите за претседател на Реал Мадрид, Флорентино Перез ги најави првите потези на неговиот нов мандат. Иако дел од фокусот е насочен кон тренерските и играчките планови, вклучително и засилувања и новиот стручен штаб, главната порака од Перез се однесува на најголемиот клупски ривал – Барселона.
Според најавите, Реал Мадрид подготвува обемно досие од околу 500 страници кое ќе биде доставено до Европската фудбалска унија. Перез случајот поврзан со Барселона и „Негреира“ го нарече „најголем случај на корупција во историјата на фудбалот“.
„Работиме на досие од 500 страници кое ќе го предадеме на УЕФА. Како да го заборавиме тоа? Станува збор за најголемиот случај на корупција во историјата на фудбалот“, изјави Перез на прес-конференција по состанок на управниот одбор, според наводи од медиумите.
Иако Реал Мадрид веќе подолг период работи на документацијата, таа сега е на пат кон седиштето на УЕФА, единственото тело кое може да донесе евентуални санкции во вакви случаи. Во дел од медиумските извештаи се наведува дека барањата од клубот одат и подалеку од евентуални спортски санкции, вклучително и ограничувања за учество во европски натпреварувања.
Перез додаде дека, според него, станува збор за долгогодишен системски проблем кој не смее да се игнорира.
„Не може да се дозволи фудбалот да биде во рацете на корупција која траела со години“, истакна тој.
МОЖЕБИ ЌЕ ВЕ ИНТЕРЕСИРА:
