На шестиот ден од упадот на руските воени сили во Украина, се чини, се подготвува голема битка за главниот град Киев. Сателитските снимки направени вчера покажуваат руски воен конвој долг 60 километри кој оди кон метрополата од северен правец. Руската војска побарала од населението да го напушти градот, а во Киев граѓаните прават барикади на улиците.
На сателитските снимки кои датираат од вчера се гледа конвој кој се „протега од околината на аеродромот Антонов кој е на 25 километри од градот па сѐ до околината на Прибирск“ на север. Снимките на американската компанија „Маџар“ покажуваат десетици возила наредени на патиштата во украинската внатрешност, од кои дел се „многу оддалечени едни од други“. Американската компанија објави и слики кои прикажуваат ново разместување на воени хеликоптери и возила во Белорусија.
Генералштабот на украинската армија на Фејсбук напиша дека руските воени сили се прегрупирале во последните 24 часа и натрупале оклопни возила и артилериско оружје „пред сѐ за да го опколат и да го стават под контрола Киев и други големи градови “ во земјата.
Украинските извори соопштија дека при вчерашните експлозии во Харков загинале најмалку 11 луѓе. По градот се забележуваат руски тенкови и оклопни возила. Според истите извори, украинската војска ја повратила контролата врз градот Мариупол.
Украинскиот претседател ја повика меѓународната заедница да размисли за целосно блокирање на воздушниот простор за руските ракети, авиони и хеликоптери.
Но САД ги отфрли повиците за воспоставување зона на забранети летови над Украина, велејќи дека тоа ќе биде чекор кон директен конфликт меѓу САД и Русија.
Инаку, Зеленски истакна дека Украина сè уште не го постигнала посакуваниот резултат во вчерашните мировни преговори меѓу украинската и руската делегација.
– Русија ги презентираше своите позиции, ние дадовме контрааргументи за да се стави крај на војната. Штом делегацијата ќе се врати во Киев, официјалните лица ќе ги анализираат позициите и ќе одлучат како да се продолжи во вториот круг преговори, објасни Зеленски.
Двете страни идентификуваа голем број главни прашања за кои требаше да се донесат „одредени одлуки“, изјави за новинарите советникот на украинскиот претседател Михаjло Подољак по состанокот, кој траеше околу шест часа.
МОЖЕБИ ЌЕ ВЕ ИНТЕРЕСИРА:
