Од СДСМ попладнево реагираа на објавата на поранешниот портпарол на ВМРО-ДПМНЕ, Димче Арсовски, по повод денешните обвинувања за доделувањето на милионски државни тендери.
Од партијата велат дека документите што ги објавија јасно ги потврдуваат „криминалните шеми на ДПМНЕ и начинот на кој се крадат парите на граѓаните“.
„Фактите се недвосмислени: тендери вредни речиси 9 милиони евра се доделени на фирма со само двајца вработени, формирана пред една година. Четири од шесте договори се склучени со Генералниот секретаријат на Владата на Мицкоски. Ова е класична шема за испумпување пари преку фирми блиски до власта“, велат од СДСМ.
Партијата наведува дека бара институциите да реагираат, а „криминалците во власта да одговараат“.
Во однос на реакцијата на Арсовски, од СДСМ појаснуваат дека од него само било побарано да одговори на прашање за евентуална роднинска поврзаност.
„Немаме за што да му се извинувааме. Човек без работен стаж коментира туѓи кариери? Човек кој лаже и краде бара извинување? СДСМ не се извинува на криминалци“, стои во партиското соопштение.
Тие додаваат: „Ниту Груевски и Мијалков не се со исто презиме, па сепак се роднини. Димче, не дефокусирај. Она што е сигурно е дека сите во ВМРО-ДПМНЕ сте роднини по криминал.“
СДСМ најавува дека утре ќе објави нови детали поврзани со скандалот „за граѓаните да видат кои луѓе стојат зад фирмите што добиваат милионски тендери и со што се поврзани“.
МОЖЕБИ ЌЕ ВЕ ИНТЕРЕСИРА:
