Полициски службеник од Граничниот премин Ќафасан е кривично пријавен под сомнение дека побарал поткуп за да овозможи нелегален премин на лице и возило преку државната граница.
Од Министерството за внатрешни работи информираат дека Одделот за внатрешна контрола, криминалистички истраги и професионални стандарди поднел кривична пријава против Д.С. до надлежното Основно јавно обвинителство за гонење на организиран криминал и корупција, поради сомнение за сторено кривично дело „примање поткуп“.
Според информациите од МВР, пријавениот, кој работел како полициски службеник во Полициската станица за граничен премин Ќафасан, преку социјална мрежа воспоставил комуникација со едно лице и побарал парични средства за себе за да изврши службено дејствие кое не смеел да го изврши.
Како што наведуваат од полицијата, бил постигнат договор на 5 април 2026 година, додека полицискиот службеник бил на работна задача на граничниот премин, да овозможи излез од државата на лице кое управувало патничко возило што не било во негова сопственост и за кое не поседувало соодветно полномошно.
Дополнително, според МВР, возилото било евидентирано како украдено во системот за контрола на патници и возила, односно се наоѓало на таканаречената „стоп-листа“.
Одделот за внатрешна контрола најави и поведување дисциплинска постапка против полицискиот службеник, како и изрекување задолжителна мерка за негово отстранување од работното место до завршување на постапката.
МОЖЕБИ ЌЕ ВЕ ИНТЕРЕСИРА:
