Иран ги негира тврдењата дека целосно го затворил Ормускиот теснец, една од најважните глобални рути за транспорт на сурова нафта, пренесува ДПА.
Портпаролот на иранските вооружени сили, Аболфазл Шекарчи, изјави на државната телевизија дека теснецот не е блокиран и дека бродовите можат да продолжат да се движат низ него.
„Сите бродови имаат дозвола да поминат, освен американските и израелските бродови. Тие немаат работа таму“, изјави Шекарчи.
Сепак, тој призна дека во услови на војна е невозможно целосно да се гарантира безбедноста на бродскиот сообраќај.
Според американски воени набљудувачи, сообраќајот низ Ормускиот теснец е намален за околу 90 проценти. Анализите на Американскиот институт за проучување на војната посочуваат дека Иран, додека има воени капацитети, ќе продолжи да се обидува да го попречува транспортот низ оваа клучна рута.
Дејствијата во Ормускиот теснец се дел од пошироката стратегија на Иран да го зголеми притисокот врз земјите од Персискиот Залив, наведува ДПА.
Теснецот претставува една од најзначајните точки за светската трговија со енергенси, бидејќи е единствената врска меѓу Персискиот Залив и светските океани. Покрај Иран, во регионот се наоѓаат и други големи производители на нафта и природен гас, меѓу кои Саудиска Арабија, Ирак, Кувајт, Катар, Бахреин и Обединетите Арапски Емирати.
МОЖЕБИ ЌЕ ВЕ ИНТЕРЕСИРА:
