Добитникот на седмица на лото од околината на Ваљево откри дека ги загубил сите пари откако добил седмица на лото и даде совет до сите да не ја повторат неговата грешка.
Зоран М. е еден од среќните добитници на лото во Србија. Пред седум години тој добил многу пари, кои сосема му го промениле животот, но и животот на неговото семејство.
Според него, овие пари не му донеле ништо добро и неколку години по добивката, тој е во поголеми финансиски проблеми и долгови.
Откако ги преживеал среќата, измамата и разочарувањето, тој ја раскажа својата приказна.
Сите знаеја кој е добитникот
Веста дека Зоран и неговото семејство добиле баснословна сума на пари брзо се проширила низ селото и за кратко време сите дознале која куќа се збогатила, раскажува Зоран за „МОНДО“.
„Имам син, ќерка и сопруга, сите бевме пресреќни со добивката и многу се израдувавме. Имавме некои долгови кои можевме да ги вратиме, и за некои работи кои ни беа потребни, но не можевме да си ги дозволиме. Исто така, требаше да седнеме заедно и да размислиме што ќе правиме со остатокот од парите, што беше голем. Никој од нас немаше искуство во големи бизниси и инвестиции“, објаснува Зоран М.
Се појавиле разни измамници
Како што раскажал среќниот добитник во семејството брзо се појавил страв од кражба, па сите сакале да ги сокријат парите и да ги стават на безбедно место.
„Веднаш потрошивме нешто за реновирање на куќата, за купување автомобил и стан во градот. Планиравме со остатокот да започнеме бизнис. Сепак, имаше проблеми. Се појавија разни измамници, со приказни кои од денешна перспектива беа како во филм. Неверојатно е на какви се постапки и измами се подготвени луѓето, само да ви ги извлечат парите“, вели Зоран М.
Го измамиле „јагуар“ и „Ферари“
Имено, овој среќен добитник најпрвин бил измамен од негови роднини, кои тврделе дека се на стабилна работа и дека многу заработуваат.
„Ми дојдоа со „јагуар“ и „ферари“ да се дружиме и да разговараме за бизнис. Признавам, бев наивен и верував во приказните за недвижнини. Бидејќи не знаев ништо за тоа, ниту пак некогаш бев бизнисмен, не им беше тешко да ме убедат. Наводно, еден од скапите станови се продавал на аукција во тоа време во Белград, а ние се договоривме да го купиме по пониска цена. Им го дадов кешот што го имав со себе, а тие ми оставија скап автомобил како гаранција. Оттогаш тие не се појавија ниту пак ми се јавија на телефон. Се испостави дека автомобилот е на агенција за изнајмување, а никогаш повеќе не ги видов“, ја открива својата судбината Зоран.
Лажен адвокат му зел пари
Но, тие не биле единствените, бидејќи луѓето, како што вели, на разни начини го „ограбувале“.
„После тоа сакав да работам работа за која ми требаше дозвола од Министерството за финансии и за неа долго се чекаше. Запознав еден човек кој ми се претстави како адвокат и можел да ми помогне. Собравме куп хартии, го однесов до канцеларијата и чекав да ја „заврши работата“. Ми рече дека се е средено и дека дозволата е добиена, само треба да ја платиме. Тој исчезна со парите, а јас никогаш не ја видов дозволата. Подоцна разбрав дека тој нема врска со Министерството, туку е измамник“, вели тој.
Можете да полудите од претпазливост
На тој начин целото негово семејство останало практично без ништо и во големи долгови. Најлошото од сè е што ја изгубиле довербата во луѓето, вели тој.
„Да ми кажеше некој дека вакво нешто може да се случи, немаше да верувам. Дури кога имаш големи пари, сфаќаш колку алчни и зли луѓе има околу тебе. Парите ја менуваат психата, личноста, карактерот и не треба да им се завидува на богатите. Сега живеам со грижа на совест дека ништо не сум обезбедил за моето семејство и дека сум потрошил сè поради луѓе кои посакувам никогаш да не ги сретнев. Затоа би сакал да им кажам на сите кои добиваат големи пари – тоа не е среќа, можете да полудите од претпазливост и да ја изгубите довербата во вашите сакани, а на крајот ќе ве измами некој за кого верувате дека ви е најсигурен човек во животот“, заклучува Зоран М.
