Иранската Исламска револуционерна гарда (ИРГЦ) соопшти дека извршила ракетен напад врз американски воени цели и инфраструктура во Бахреин, при што, според тврдењата на Техеран, била погодена и инфраструктура поврзана со американската компанија „Амазон“.
Според соопштението на ИРГЦ, воздухопловно-вселенските сили употребиле повеќе крстосувачки ракети, а цел на нападот биле објекти во областите Мухарак и Рифа. Како погодени цели се наведуваат системи за противвоздушна одбрана, радарски инсталации и објекти за кои Иран тврди дека се поврзани со американски технолошки капацитети.
Засега нема независна потврда за овие наводи. Властите во Бахреин, Соединетите Американски Држави, како и компанијата „Амазон“, сè уште немаат излезено со официјални информации во врска со тврдењата на Иран.
Од ИРГЦ наведуваат дека нападот бил одговор на, како што тврдат, американски напад врз цивилни објекти во изградба во Дарховин. Иранските власти во меѓувреме побараа од Меѓународната агенција за атомска енергија (МААЕ) и Советот за безбедност на Обединетите нации да го осудат американскиот напад врз нуклеарната централа Дарховин.
Од МААЕ информираа дека ги разгледуваат добиените информации за инцидентот, но досега немаат објавено независна проценка или потврда за случувањата.
Новата размена на обвинувања дополнително ги зголемува тензиите на Блискиот Исток, каде во последниот период се интензивираат заканите и воените активности меѓу Иран и САД.
МОЖЕБИ ЌЕ ВЕ ИНТЕРЕСИРА:
