Со волонтерска акција на членови на Здружението на армиски и полициски ветерани од активен и резервен состав – ЗАПВАРС Куманово, исчистен е споменик од НОБ во општина Липково. Споменикот беше во запуштена состојба и обраснат со дрвја. Тој е подигнат во чест на борците на Кумановско-карадачкиот партизански одред, кои загинале на 14 октомври 1941 година во борба со бугарскиот фашистички окупатор. Споменикот се наоѓа на м.в. „Воденица“ во планинското село Белановце на македонско-косовската граница на тешко пристапен терен. Откако го исчистиле, ветераните положиле цвеќе на обележјето на паднатите борци.
-На ова место на 14 октомври 1941 година Кумановско-карадачкиот партизански одред водеше херојска борба со бугарската окупаторска војска и полиција за национално и социјално ослободување на македонскиот народ и братските народи и народности на Југославија. Во борбата загинаа Боро Менков – командант на одредот, Перо Чичо, Бајрам Шабани, Магдалена Антова, Киро Бурназовски, Аритон Димковски – Тонко и Наце Буѓони, пишува на плочата пред споменикот, кој бил подигнат 1986 година од Општинскиот одбор на Сојузот на борците од НОБ Куманово.
Градоначалникот на општина Куманово Максим Димитриевски соопшти дека упатил голема благодарност до членовите на здружението ЗАПВАРС Куманово за посетата на овој локалитет заборавен со децении од сите, локалитет кој се наоѓа на многу непристапен терен.
-Вечна им слава на паднатите борци, потенцира Димитриевски.
МОЖЕБИ ЌЕ ВЕ ИНТЕРЕСИРА:
