Лансирањето на ракетата „Сојуз МС-28“ од космодромот Бајконур заврши со неочекуван инцидент – веднаш по полетувањето се урна мобилната сервисна кабина под лансирната рампа, соопшти „Роскосмос“. Иако на земјата имаше штета, леталото без проблем пристигна на Меѓународната вселенска станица со двајца руски космонаути и астронаут од НАСА.
Според првичните процени, токму оваа кабина е клучна за подготовка на сите мисии „Сојуз“ и „Прогрес“, па нејзиното уништување може да предизвика сериозни одложувања. Рускиот независен медиум „Медуза“ предупредува дека без неа лансирањата со екипаж привремено ќе запрат – прв прекин од 1961 година. Од „Роскосмос“ уверуваат дека штетата ќе биде брзо санирана, бидејќи деловите за поправка веќе се на располагање.
Екипажот што успешно пристигна на МВС треба да остане во орбитата околу осум месеци, а нивното враќање е планирано за јули 2026 година.
И покрај тензичните односи меѓу Москва и Вашингтон поради војната во Украина, соработката во вселенската програма останува една од ретките активни врски меѓу двете земји. Во последниот период се споменуваат и иницијативи за поблиска технолошка соработка, вклучително и со компанијата „СпејсИкс“ на Илон Маск.
МОЖЕБИ ЌЕ ВЕ ИНТЕРЕСИРА:
