Претседателот на СДСМ, Венко Филипче, денеска остро ја критикуваше Владата предводена од ВМРО-ДПМНЕ и коалицијата ВЛЕН, обвинувајќи ги дека го довеле пензискиот систем во сериозна финансиска нестабилност со, како што рече, „лоши и непромислени политики“.
Филипче прес-конференцијата ја започна со коментар дека од власта доаѓаат „невидени лаги и манипулации“, дури и од премиерот. Според него, се води кампања чија цел е вината за состојбата во пензискиот фонд лажно да се префрли врз СДСМ.
„Хаосот во пензискиот систем е нивно дело, не наше“, изјави тој, додавајќи дека владата ги користи институциите за политички притисок и дека пласира невистини дека СДСМ наводно сакал да ги намали пензиите.
Лидерот на СДСМ оцени дека предизборните ветувања и популистичките мерки на актуелната влада го довеле системот на „работ на одржливост“, што создава ризик и за редовната исплата и за идните зголемувања на пензиите.
Филипче потсети дека во времето на СДСМ бил применуван модел на усогласување на пензиите според 50% инфлација и 50% раст на платите, кој според него обезбедувал стабилност. Тој тврди дека доколку продолжел тој модел, голем дел од пензионерите денес би добиле повисоко зголемување од актуелните 1.000 денари што ги нуди Владата.
Тој оцени дека новото владино решение е „несоодветно и потенцијално противуставно“, повикувајќи се на сигналите што, како што рече, дошле од Уставниот суд.
МОЖЕБИ ЌЕ ВЕ ИНТЕРЕСИРА:
