Бугарија ја зафатија најмасовните протести во последните децении, откако владата го предложи буџетот за 2026 година со зголемување на даноците и придонесите. Десетици илјади граѓани излегоа на улиците во Софија, Пловдив, Варна, Бургас и други градови, обвинувајќи ја власта за корупција и прикривање на финансиски злоупотреби.
Во Софија, демонстрациите прераснаа во инциденти – маскирани лица се судрија со полицијата и ги нападнаа канцелариите на партиите Герб и ДПС. Повеќе од 70 лица беа уапсени, соопшти Министерството за внатрешни работи.
По силниот притисок од протестите, владата соопшти дека го повлекува предлог-буџетот, кој требаше да биде првиот подготвен во евра пред формалното влегување во еврозоната на 1 јануари. Дел од јавноста стравува дека усвојувањето на еврото може да донесе дополнителна инфлација во една од најсиромашните земји во ЕУ.
Протестите против корупцијата не се новост во Бугарија, земја со чести политички кризи и краткотрајни влади од 2020 година. Мнозинството демонстранти бараат системски промени и „европска држава без мафија“, како што изјави дел од младите учесници.
МОЖЕБИ ЌЕ ВЕ ИНТЕРЕСИРА:
