Вицепремиерот Александар Николоски деновиве престојува во Брисел, каде што учествува на повеќе значајни европски настани и состаноци поврзани со проширувањето на ЕУ и развојот на транспортните политики во регионот.
Во рамки на посетата, Николоски ќе земе учество на настанот „Прашања за проширување: Новата геополитичка, безбедносна и економска граница на Европа“ организиран од „Пријатели на Европа“, каде што ќе има свое обраќање. На панел-дискусијата посветена на политиките за проширување на Европската Унија ќе говори заедно со албанскиот премиер Еди Рама, со Ана Брнабиќ, претседател на Националното собрание на Србија, со молдавската вицепремиерка Кристина Герасимов и со Герт Јан Купман, генералeн директор за источно соседство и проширување во Европската комисија.
Во петок, Николоски ќе учествува и на Министерскиот совет на Транспортната заедница, на кој ќе претседава европскиот комесар за одржлив транспорт Апостолис Цицикостас. На состанокот ќе се разгледува напредокот на земјите од Западен Балкан во делот на транспортните политики, како и реализацијата на клучните инфраструктурни проекти.
Вицепремиерот ќе информира за состојбата и развојот на транспортните политики во Македонија, вклучително и напредокот на проектите поврзани со европските транспортни коридори 8, 10 и 10-д, како и мерките за олеснување на трговијата и транспортот во регионот.
На министерскиот совет ќе присуствуваат министри и владини претставници од повеќе европски држави, меѓу кои Србија, Црна Гора, Албанија, Косово, Бугарија, Словенија, Кипар, Романија и Ирска. Покрај тоа, предвидени се и низа средби со претставници на Европската комисија.
МОЖЕБИ ЌЕ ВЕ ИНТЕРЕСИРА:
