Најмалку 40 лица го загубија животот, а околу 100 се повредени во силна експлозија и пожар што избувнаа ноќеска во бар во познатото швајцарско скијалиште Crans-Montana, соопшти полицијата.
Несреќата се случила околу 1:30 часот по локално време, за време на новогодишна прослава во барот Le Constellation. Причината за експлозијата засега не е официјално утврдена, а истрагата е во тек, пренесува BBC.
Според информациите од полицијата, објектот бил преполн во моментот на инцидентот, што значително придонело за големиот број жртви. Болниците во регионот работат со максимален капацитет поради големиот број тешко повредени лица, од кои многумина се со сериозни изгореници.
Поради состојбата, надлежните служби упатија апел до туристите и скијачите да бидат особено внимателни, а дел од скијачките капацитети во Crans-Montana привремено се затворени.
Сведоштва на преживеани укажуваат дека пожарот се проширил исклучително брзо. Очевидци раскажуваат дека за неколку секунди таванот на објектот бил зафатен од пламен, по што настанале паника и стампедо.
Министерот за надворешни работи изјави дека постои можност пожарот да бил предизвикан од петарда фрлена за време на новогодишната забава, но нагласи дека ваквите информации сè уште не се потврдени. Според него, идентификацијата на загинатите би можела да потрае со недели поради тежината на повредите.
Надлежните власти најавија дека јавноста ќе биде дополнително информирана како што истрагата напредува.
МОЖЕБИ ЌЕ ВЕ ИНТЕРЕСИРА:
