Министерката за образование Весна Јаневска најави дека најуспешните студенти ќе добијат предност при вработување на државните универзитети како наставно-научен кадар. Таа на прес-конференција ги претстави предложените законски измени во областа на високото образование, квалитетот во науката и научно-истражувачката дејност, од кои дел веќе се објавени на ЕНЕР и се отворени за јавни коментари.
Според најавите, оваа можност ќе се однесува на студентите кои студираат со државна стипендија на некој од првите 100 универзитети во светот, добитниците на „Инженерски прстен“, како и студентите прогласени за најдобри на своите универзитети во Македонија.
Предложените законски измени предвидуваат и нов модел на финансирање на универзитетите, со развојна компонента и дополнителна поддршка за институциите што ќе постигнуваат подобри резултати. Целта е да се поттикне повисок квалитет во наставата и научната работа.
Министерката најави и построги критериуми за напредување во академските звања. Кандидатите за доцент, вонреден и редовен професор ќе треба да имаат објавено шест до седум научни трудови, при што дел од нив мора да бидат во списанија со импакт-фактор индексирани во Web of Science или Scopus. Таа посочи дека македонските универзитети годишно објавуваат значително помалку научни трудови отколку што е потребно за подобро рангирање на меѓународните листи.
Законот предвидува и одредени олеснувања за професорите кои веќе се во постапка за избор во звање, како и можност наставник да остане во исто звање доколку ги исполнува условите при секој реизбор. Во иднина редовните професори ќе се реизбираат на секои седум години, додека оние што веќе го имаат тоа звање нема да бидат опфатени со новите правила. Мандатот на ректорите се предлага да се продолжи на четири години, а ќе се менува и моделот на нивен избор.
Во однос на областите од општествените науки, министерката рече дека се предвидени прилагодени услови. Одредени дисциплини, како филологија, национална историја, фолклор, археологија и етнологија, ќе можат да објавуваат трудови во списанија индексирани во Scopus, што треба да го олесни периодот на приспособување кон новите стандарди.
Јаневска најави и можност за намалување на бројот на високообразовни институции, како и воведување модуларен систем на студии. Според тој модел, првите години од студирањето ќе бидат заеднички за сите студенти на одредена насока, а подоцна ќе следува специјализација во рамки на студиската програма.
МОЖЕБИ ЌЕ ВЕ ИНТЕРЕСИРА:
